کراچی میں ڈکیتی کی انوکھی واردات نے سب کو پریشان کر کے رکھ دیا

کراچی میں ڈکیتی کی انوکھی واردات نے سب کو پریشان کر کے رکھ دیا

• November 25, 2019, 11:00 am
• National News
• 279 Views

کراچی(ویب ڈیسک) یہ دُنیا ابھی رحم اور احساس سے خالی نہیں ہوئی۔ بڑے بڑے مجرمانہ ذہنیت کے حامل لوگوں میں بھی خدا خوفی اور انسانیت کی رمق پائی جاتی ہے۔ ایسی ہی ایک مثال کراچی کے علاقے کورنگی 5میں دیکھنے میں آئی جہاں ڈاکو آئے توایک گھر میں رقم اور قیمتی سامان لُوٹنے کو تھے، مگر عین وقت پر اللہ تعالیٰ نے اُن کے دِل میں ایسا رحم ڈالا کہ وہ سب لُوٹی ہوئی مال و دولت چھوڑ چھاڑ کر وہاں سے چلتے بنے، اور دلچسپ بات یہ ہے کہ جاتے ہوئے اہلِ خانہ کو دُعائیں دے کر رخصت ہوئے۔
تفصیلات کے مطابق چار ڈاکو دِن دیہاڑے ایک گھر میں ڈکیتی کی غرض سے گھُس گئے جہاں اس وقت صرف تین عورتیں موجود تھیں۔ ڈاکوؤں نے ان خواتین کو یرغمال بنا کر لُوٹ مار شروع کر دی۔
ایک کمرے سے قیمتی سامان اور نقدی لُوٹ کر جب یہ ڈاکو گھر میں واقع ایک اور کمرے میں گئے تو وہاں پر موجود ایک خاتون نے اُنہیں دیکھتے ساتھ ہی اپنا چہرہ چادر سے ڈھک لیا اور اُن سے درد بھرے لہجے میں کہنے لگی کہ وہ جو سامان لُوٹ کر لے جانا چاہیں، لے جائیں مگر اس کے سامنے نہ آئیں، کیونکہ وہ ان دِنوں عِدت سے ہے، ابھی دو ہفتے قبل ہی اُس کے خاوند کی وفات ہوئی ہے۔

بس اتنا سُننا تھا کہ ان ڈاکوؤں کے دِل کی کیفیت یکایک بدل گئی اوروہ لُوٹا ہوا تمام سامان وہیں چھوڑ کر فوری طور پر چلے گئے۔ یہی نہیں بلکہ جاتے جاتے گھر والوں سے کہہ گئے کہ وہ ان کے حق میں بھی دُعا کریں۔اس واقعے کی ویڈیو بھی سامنے آئی ہے جس میں گھر والے دکھا رہے ہیں کہ کیسے ڈاکوؤں نے الماریوں سے کھینچ کھینچ کر سامان نکالا مگر جاتے وقت تمام نقدی، زیورات، موبائل فون اور دیگر قیمتی اشیاء ڈائننگ ٹیبل پر رکھ گئے۔ گھر والوں نے رحم دِل ڈاکوؤں کے جانے کے بعد تمام اہلِ محلہ کو اکٹھا کر کے ساری کہانی سُنائی تو وہ بھی حیران رہ گئی۔