آرمی چیف جنرل قمرجاوید کا شمالی وزیرستان کا دورہ، پاک افغان بارڈر پرآپریشن پربریفنگ دی گئی

آرمی چیف جنرل قمرجاوید کا شمالی وزیرستان کا دورہ، پاک افغان بارڈر پرآپریشن پربریفنگ دی گئی

• August 24, 2020, 11:28 pm
• Breaking News
• 219 Views

پاک فوج کے سربراہ جنرل قمر جاوید باجوہ نے کہا ہے کہ پاکستان بارڈرکی سیکیورٹی بہتربنانے میں موثرکرداراداکررہاہے، ہمیں دشمن کی چالوں، حملوں سے ہمہ وقت چوکس اور تیار رہنا ہوگا ،دشمن کے انتشار،افراتفری پھیلانے کے منصوبے ناکام بنائیں گے،آپریشن ردالفسادکی کامیابیاں رائیگاں نہیں جانے دیں گے۔
پیر کو ڈی جی آئی ایس پی آر کے مطابق آرمی چیف جنرل قمر جاوید باجوہ نے شمالی وزیرستان میں پاک افغان بارڈر کا دورہ کیا ۔ آرمی چیف نے پاک افغان سرحد کے داوائی سیکٹر کے دشوار علاقے میں استحکام لانے کے آپریشنز میں مصروف فوجیوں سے بات چیت کی ۔ڈی جی آئی ایس پی آر کے مطابق حالیہ آپریشنز کے دوران دشوار گزار علاقوں میں دہشت گردوں کے زیر استعمال ٹھکانوں و راستوں کا کنٹرول مستحکم کیا گیا۔
ڈی جی آئی ایس پی آر کے مطابق حالیہ آپریشنز میں ان دشوار علاقوں میں 90 آئی ای ڈیز ناکارہ بنائی گئیں۔ آرمی چیف کو بتایاگیاکہ دشوار گزار پہاڑی علاقوں کے پاک افغان بارڈر پر فینسنگ کا کام جلد شروع کیا جائے گا۔ بتایاگیاکہ شمالی وزیرستان سے منسلک انٹرنیشنل بارڈر کے اس آخری مشکل حصہ پر بھی سیکیورٹی فورسز کا موثر کنٹرول ہو گیا ہے۔
ڈی جی آئی ایس پی آر کے مطابق آرمی چیف کو پورے پاک افغان بارڈر پر باڑ لگانے سمیت سرحدی سیکیورٹی انتظامات پر مکمل بریفنگ دی گئی۔ ڈی جی آئی ایس پی آر کے مطابق آرمی چیف نے فوجی دستوں کی زبردست آپریشنل کارکردگی کو سراہا اور کہاکہ ہم امن و استحکام کے لیئے پرعزم ہیں۔ آرمی چیف جنرل قمر جاوید باجوہ نے کہاکہ امن و استحکام کیلئے پاکستان سرحدی سیکیورٹی مضبوط بنانے اورایف سی کی استعداد میں اضافے کا اپنے حصے کا کام پورا کر رہا ہے۔
آرمی چیف نے دہشت گردی کے خلاف قبائلی عوام کی غیر متزلزل حمایت کو سراہا اور کہاکہ عمومی طور پر خطے میں امن واپس آ گیا ہے۔انہوںنے کہاکہ سخت محنت سے حاصل امن کے فوائد برقرار رکھنے کے لیئے مقامی آبادی، انتظامیہ، قانون نافذ کرنے والے اداروں کو مشترکہ کوششیں کرنا ہیں۔ انہوںنے کہاکہ ہمیں دشمن کی چالوں، حملوں سے ہمہ وقت چوکس اور تیار رہنا ہے۔ ڈی آئی ایس پی آر کے مطابق آرمی چیف جنرل قمر جاوید باجوہ نے میران شاہ کا بھی دورہ کیا۔ شمالی وزیرستان آمد پر کور کمانڈر پشاور لیفٹیننٹ جنرل نعمان محمود نے آرمی چیف کا استقبال کیا۔