بلوچستان کے کئی بند کیسزمیں قانونی شواہد موجود ہیں اس لئے انھیں میرٹ اور قانون کے مطابق دوبارہ کھولا جائے گا،چ

بلوچستان کے کئی بند کیسزمیں قانونی شواہد موجود ہیں اس لئے انھیں میرٹ اور قانون کے مطابق دوبارہ کھولا جائے گا،چیئرمین نیب

• July 10, 2018, 9:04 pm
• National News
• 82 Views

کوئٹہ (سٹاف رپورٹر)چیئرمین نیب جسٹس جاوید اقبال نے کہا ہے کہ قومی احتساب بیورو ملک سے کرپشن کے خاتمے کا فر یضہ قومی ذمہ داری اور اعزاز سمجھ کر کر رہا ہے ،کرپٹ عناصرکو اپنی کرپشن کا حساب دینا ہو گا ، بلوچستان میں کیسز کے ذاتی مطالعے سے متعددبند کیسزمیں قانونی شواہد موجود پائے ، اس لئے انھیں میرٹ اور قانون کے مطابق دوبارہ کھولا جائے گا ، منصف کی کرسی کے تقدس کو سمجھتا ہوں اس لئے نہ میرٹ پر سمجھوتا کیا ہے اور نہ کرونگا نیب افسران کو میری طرف سے مکمل تحفظ حاصل ہے اس لئے کسی بھی دباؤ کو خاطر میں نہ لایا جائے، سیاستدانوں سمیت ہر شخص کی عزت نفس کا احساس ہے ،کاروائی قانون اور آئین کے مطابق ہی کی جاتی ہے۔ان خیالات کا اظہار چیئرمین نیب جسٹس جاوید اقبال نے دورہ بلوچستان کے موقع پر بریفنگ اور افسران سے خطاب کے موقع پر کیا۔ڈائر یکٹر جنرل نیب بلوچستان مرزا محمد عرفان بیگ بھی اس موقع پر موجود تھے۔انھوں نے کہا نیب افسران مقدمات کو قانون کے مطابق پایہ تکمیل تک پہنچانے کے لئے ہنگامی بنیادوں پر کام کریں، کرپٹ عناصر کے خلاف کیسز میں غیرضروری التواء برداشت نہیں کیا جائیگا ، بے لاگ اور بلا امتیاز کا روائیوں کا تسلسل آئندہ بھی اُسی قومی فریضے کی انجام دہی کے جذبے کے ساتھ جاری رہے گا، تمام مقدمات کو میرٹ ، شفافیت اور قانون کے تقاضوں کو ملحوظ خاطر رکھتے ہوئے منطقی انجام تک لیجایا جائے ۔انھوں نے افسران سے خطاب کرتے ہوئے کہا کہ پاکستان کی مٹی کا ہم پر قرض ہے ہم نے اس قرض کو بطریق احسن لوٹانا ہے۔ اگر ہم نے ایمانداری ، دیانت سے کرپٹ عناصر کے خلاف مکمل جانفشانی کے ساتھ کام کیا تو میں سمجھتا ہوں ہم نے پنے حصے کا کام کر دیا ہے۔انھوں نے کہا دیانت ، ایمانداری کے زریں اصولوں کے مطابق کام کرنے سے اللہ کی مدد شامل حال ہو جاتی ہے بد عنوانی کے اندھیرے دور کرنے کے لئے اپنے حصے کا چراغ سب کو روشن کرنا ہو گا ۔ جسٹس جاوید اقبال نے ملک میں کرپشن کے عوام الناس کی زندگی پر اثرات اور مجموعی طور پر مضمرات پر اظہار افسوس کرتے ہوئے کہا کرپشن کی وجہ سے پاکستان 90 ارب ڈالر کامقروض ہو چکا ہے ۔ہماری5 نسلوں کو اس قرض کے وبال کو بھتگنا ہے۔ ہر پاکستانی تقریبا 1 لاکھ 70ہزار کے مقروض ہے ۔ اس لئے کرپشن کی لعنت کو ہم سب نے ملکر ختم کرنا ہے اس کے لئے نیب کے تمام افسران اور عملے کا بھر پور تعاون ناگزیر ہے ۔چیئرمین نیب نے کہا بد عنوانی کا مرتکب شخص ملک و قوم کا مجرم ہے اسی لئے ہر کرپٹ شخص کو اسکے برے فعل و عمل کا جوابدہ بنایا جا رہا ہے ، نیب کا کام کرپشن کے خلاف تحقیقات کو میرٹ ، شواہد، شفافیت اور قانون کے تقاضوں کو ملحوظ خاطر رکھتے ہوئے اپنا فرض منصبی سر انجام دینا ہے اس پکڑ میں کوئی عام شخص آئے یا خاص کاروائی قانون کے مطابق ہی ہو گی۔ انھوں نے نیب بلوچستان کی کار کردگی کو سراہتے ہوے کہا نیب بلوچستان کی کار کردگی اچھی ہے لیکن اس کو مزید بہتر بنایا جا سکتا ہے ۔ چیئرمین نیب نے لیگل ونگ کو مخاطب کرتے ہوئے کہا کہ وہ عدالت میں دائر کیسز کو منطقی انجام تک پہنچانے کے لئے کوئی کسر اُٹھا نہ رکھیں۔